Mangiare

機緣巧合下我跟咗個朋友去咗間堅尼地城嘅意大利小餐廳，叫做MANGIARE，堅尼地城地鐵站一出行5分鐘。好容易，門面唔算大，係門到已經有張枱。入到去d枱已經坐滿哂，因為我朋友識個chef就留咗張枱先唔洗等，大家去之前記得打電話留位。

間餐廳嘅concept係做意大利嘅Street Food，唔好聽到Street Food 以為好求其，但每一道菜都係五星級大廚用心煮出黎。

先講講個大廚，佢叫LUCA PIAZZA，係之前澳門威尼斯人間Portofino主廚。佢離開咗威尼斯人後就開咗呢間餐廳。佢係南意大利搜羅咗好多特式嘅recipe，將入面嘅元素加上Luca 嘅煮法，就係呢間餐廳主要賣嘅野喇。

Chef Luca 同Suppliers 關係好好，所以Suppliers每日都會提供新鮮嘅食材比Luca，所以佢都唔知聽日會煮咩架，牆上嘅ＭＥＮＵ每日都會更新，所以我下面講嘅dish到你去嘅時候未必有機會食得返架。　間餐廳一日唔會接太多客，基本上賣哂d食材就會關門。因為暫時未有酒牌，所以未有得賣酒住。

　

到咗之後，見到Chef Luca同侍應都好熱情招呼。一入去已經聞到食物嘅香味，見到counter上嘅新鮮食材，真係食指大動呀。平時嘅客人就可以望牆上揀想食咩，牆上係意大利文，廚房裡面牆就係英文。但因為我地識Chef Luca，就決定比佢拍板，佢煮咩我地食咩，超級緊張同興奮唔知佢會煮咩我地食呢。

坐定咗冇幾耐侍應就serve 咗意大利辣肉腸帶子意大利粉。Chef Luca個話意大利辣肉腸同chorizo有d似但係辣味同鹽分比較重，佢特別係意大利帶反嚟，帶子大大粒好爽口Chef煮到剛剛熟，意粉就比較硬，因為係意大利人口味，非常正宗。

紅酒繪八爪魚：中間放咗麵包，麵包作用係吸收哂汁嘅精華。汁有紅酒之餘有其他蔬菜嘅味道，有紅蘿蔔，薯仔，香草。煮八爪魚其實好難煮得好，但佢煮得煙煙ｕｎｕｎ，唔會太硬，八爪魚入哂味，正。不可不提係麵包，麵包由意大利直接入口嘅麵包，每星期入貨兩次。因為香港搵唔到佢想要quality，而整靚麵包又要用外國入口嘅材料同一個超大嘅爐，但地方細細，所以決定由意大利直接空運過黎。

到另一個pasta喇，意大利腸雜菌長通粉。呢個意大利腸唔同之前個辣肉腸你亦都唔會見到一條條嘅腸Chef Luca 會將佢整到肉碎咁。而且今次呢個pasta侍應會即時刨芝士落去，隻芝士係hard ricotta cheese，呢個意粉比頭先果個清新，磨姑索哂佢嘅秘制醬汁，超有味。

下一道係煎Hammer Jack fish，加咗好多蔬菜，香料，同秘製醬汁，入面有parsley同thyme，呢隻魚係比較硬身嘅魚，我本人鐘意食油性多ｄ淋身啲嘅魚，所以我唔係太鐘意個魚，但個味道真係好好，蔬菜帶出咗魚嘅新甜味。

最後一味係龍蝦燴，類似湯咁嘅野。果日個Supplier 送咗好多龍蝦比佢，佢就即刻做咗呢個菜，入面主要係龍蝦，同比較細嘅魷魚仔，入面都有一塊包，索哂ｄ湯，好鮮甜，飽到想嘔都要食，太好食。估唔到個湯可以咁清新但又好有鮮味。

順便一提，基本上所有菜都有辣味，佢用咗好多唔同香料 ,提升食物嘅鮮味，少少辣得味吊到個原食材嘅味出黎，岩岩好。

廚師係以好優惠嘅價錢但做出五星級酒店嘅質素，性價比絕對係超高！佢亦都一步步改變緊香港人對意大利菜嘅觀念，大家記住意大利菜唔只得意粉pizza，仲有好多其他唔同種類嘅。想試多d可以黎呢到:

Mangiare 堅尼地城，加多近街45-55號，4號鋪

tel: 2388 3861

https://www.facebook.com/mangiarehk?fref=ts&ref=br_tf