A Lorcha 船屋葡國餐廳

澳門＝葡國餐
去澳門唔食葡餐你唔會周身唔自在咩。德國男友一年前去過澳門，之後念念不忘，所以今次佢黎到我亦安排咗澳門一日遊。1：30pm落船立刻飛的去A Lorcha船屋葡國餐廳醫一醫我地2個就嚟反消化嘅胃。

船屋葡國餐廳係冇水比嘅，冇錯，水都要收錢。我地叫咗檸檬茶，不過都幾細杯，下次都係叫返水算。之後侍應好快，送上麵包，熱辣辣，外面脆卜卜,裡面軟淋淋，超正！

叫咗2個頭盤，八爪魚沙律同燒chorizo配黑橄欖。 八爪魚沙律裡面有大量洋蔥，芫荽，mix咗橄欖油，檸檬汁，辣椒粉。八爪魚有啲un,汁唔夠，只係不過不失。 chorizo配黑橄欖也係不過不失，唔太推介。

船屋其中一個推介既係葡式燴海鮮飯，裡面有超多海鮮：青口、蟹、蝦仔。你睇到個飯好似好淋patpat咁但係其實係柔硬適中，成煲飯比個汁包住，超級好味道，海鮮嘅鮮味參灑入飯！！依煲飯的份量好大，配對適量嘅海鮮，唔知點解食極都食唔完！個飯雖然食極都食唔完但係你唔會覺得滯，我而家見到相都流口水！

蒜容炒蜆，依一味係澳門成日都會見到嘅，船屋用一個大窩上（又嚟咁大煲？）個＝蜆超級鮮甜，窩裡面我搵唔到一粒係冇開嘅，雖然用咗唔小橄欖油，但係一啲都唔油腻,我地用麵包喪吸啲湯汁，到最後索性用匙將啲湯飲埋。依一味又係食極都食唔完，我地要check check個煲係唔係有煲底。比起其他澳門嘅葡國餐，份量差好多。留意我地之後嘅post就會知道！（叫額外麵包冇加錢）

我嘅男朋係唔係太好海鮮，喺我同朋友狂拆海鮮嘅時候，當然要照顧他嘅感受啦，佢自己order咗蘑菇忌廉汁牛扒配炸薯條，侍應問咗牛扒要幾成熟，佢要咗7成熟，但係變咗4﹣5成，成隻碟變咗個血案。其實碟扒係幾好味！蘑菇忌廉汁係好濃！牛扒係好淋又有肉味！薯條炸得好香脆！！如果唔係廚房趕收工，應該會煮得再好啲！

船屋嘅份量係好大，食極都食唔完！！最後打包，比我地朋友食。總體嚟講，船屋係好食之餘，又平嘅選擇，服務又唔錯。會係反轉頭嘅選擇。