恆發雞蛋仔

傳說中恆發雞蛋仔我終於都有機會領會到佢有幾好食。芋頭餡雞蛋仔，超足料，真係不得了。

星期日我由屋企出發，搭小巴落觀塘，見順路就轉個靚彎去食呢個超出名既雞蛋仔。一去到超多人排隊，咁我就乖乖跟住排隊尾啦。一路排一路諗食咩味，佢有好多隻味，有芋頭，紅豆，朱古力，芝麻，芝士。排到咁上下有個哥哥黎問要咩，我超鐘意食芋頭，所以我用左0秒就決定要芋頭，仲有排得咁Q辛苦，緊係試多隻味，就揀芝士啦。

排排排排排排，由我開始排隊果刻，到我拎到餅雞蛋仔，我足足用左半個鐘。普通既雞蛋仔我緊係唔會排咁耐啦肯，痴線咩。但係呢一間既，就算要排咁耐，我都覺得值！

間鋪有一概８個爐左右，你嗌完佢就會即刻整架喇。因為佢超足料，唔會同你慳蛋漿，唔似得有D雞蛋仔個殼入面咩都冇，所以等既時間要耐Ｄ。Ｄ蛋漿煮左一陣，佢就落餡料喇。個姐姐仲話Ｄ芋頭係每日係街市買返黎再整，保證新鮮，唔係現成買返黎。

夾返埋之後，最後仲會係兩邊倒漿封邊，你話，有幾可會咁好同你封邊。

整左３，４分鐘，再等多一兩分鐘，吹吹就食得

超鐘意芋頭既我，第一啖緊係食芋頭啦。嘩一食落去外脆內暖，餡料超豐滿，芋頭仲多過蛋漿，一粒粒咁好有咬口，而且唔會太甜。好有蛋香，真係好好食，唔洗半個鐘我一個人隊哂成餅。

另一餅芝士味呢，我就略嫌唔夠芝士味喇。因為佢係一塊平時夾面飽既芝士FOR一餅，所以唔係好夠分，呢餅我就拎返屋企食喇。

恆發係觀塘地鐵 A1出口， 經裕民坊連住同仁街協和街行上去，行十分鐘到就到喇。