暌記潮州飯店

因為有個朋友係新蒲崗附近玩槍，佢樓下就有間潮州打冷，叫暌記，咁我地去試下啦！

我地叫左個鹵水大拼盤，但係呢個拼盤又唔可以拼鵝片，但係我地又好想食喎，唯有另嗌啦！

呢個大拼盤值得一讚！因為佢有樣野好正，就係佢既墨魚片喇！佢做到非常爽口，好有味，唔似平時出面唔知食左d咩冇咩味果隻。真係非常非常好食！拼盤入面有鵝腸，紅腸，芽菜，鹵水豆腐同大腸既，每一樣野都好出色！連紅腸都好好食喎竟然！因為佢既精髓就係佢豉油做得非常之好！佢個鹵水就係帶甜，本身我都好鐘意食甜d既汁，所以我覺得好好食！

不過鵝片就麻麻喇，都幾鞋下，雖然佢幾薄，但係食完會有渣，not good not good。

朋友熱烈推介我地食蠔仔粥同炸蠔餅，呢個蠔仔粥好足料，一煲入面有好多蠔仔！加埋d肉碎又真係好好食喎！好鮮味，完全唔洗加胡椒粉。個蠔餅炸得好鬆脆，仍然都係好多蠔仔好足料！不過因為d粉漿吸哂d油，我覺得比較油膩。

最後緊係要整返個菜，叫左蒜頭炒A菜。炒得好好，好有獲氣，條條都會掛到少少清湯。唔會太油同太咸，炒得非常之好食！最後叫左炒沙芋，炒沙芋姐係將糖同一條條既芋頭一齊炒，炒到芋頭熟哂為止。你睇到佢個樣可能會以為佢好甜，但又唔係喎！拎起時面頭d糖會跌哂落去，所以食落就岩岩好！不過食落去好熱，唔小心辣親個嘴，大家食果時要小心d呀！

呢間我覺得係值得推介，佢係馬會附近，去開新蒲岡既就去試下啦！

暌記潮州飯店

新蒲崗康強街32號地下12號舖

Foxtail & Broomcorn

今日80後既lunch就去左foxtail! 呢間鋪頭專食麵 。一入到去嘩我以為自己入左間西餐廳！佢既裝修用左好多鏡面，以湖水藍為主色，坐得幾舒服。雖然我入去既時候唔係話好多人，但我諗就算full哂時都應該唔會話坐得迫。

有8－10種麵比你揀，話多唔話，話少唔少咁啦。我今日揀左tokyo 麵。呢個麵底就好似拉麵咁，湯就好似係雞湯。配上溫泉蛋，木耳，芫茜，大蔥，冬菇同埋牛肋骨既料。食出黎感覺唔錯，湯底好清好清，因為佢標榜冇味精！冬菇唔算好多，得幾塊，但係好滑好滑。佢個牛肋骨炆到好淋好淋，但都唔會一咬就散，亦都唔多肥肉係上面。木耳條爽脆。一碗麵70－90蚊左右，份量充足，夠食飽一個男人！

頭先講到以為自己入左西餐廳，原來呢間鋪既老細真係外國人黎！老細係瑞士人！佢就想做亞洲既麵但係又想迎合西式市場，話哂間鋪頭係上環，多d外國人。但我覺得對香港人都係另一種嘗試，試下d唔同既麵！你知啦打工仔食lunch唔係飯就麵架啦！

Foxtail & Broomcorn
上環蘇杭街84號地下

芽莊

呢日sergio rossi 係time square 開倉大減價，wow 80後執到對600蚊nude 色high heel，超抵！血拼完後就去芽莊喇，因為係80後既last day ，老細請食飯！

90後叫左個雞絲粉，其實我鐘意食河粉，不過佢冇，雖然個質感同河粉差唔多，但係我都係鐘意薄d既河粉。大大碗，食唔哂。

至於80後既生牛肉河，限量果隻 (According to the menu)，個湯都幾清，典型既越式湯低。d粉係唔會浸耐左就索哂水淋patpat果隻。至於牛都好有牛肉麵同咬口。ok

仲叫左小食雞翼同豬頸肉沙律，個雞翼脆扑扑，岩哂我呢個雞翼控！個豬頸肉就硬硬地，個沙律我都麻麻地

但呢到好好既係唔洗等位，d野又黎得快。作為快食既選擇都幾好既。

芽莊

時代廣場食通天13樓1303號舖 

沙嗲王

沙嗲王我諗唔少人都食過，佢係我九十後大學時gathering成日都會去食既地方，原因好簡單，平靚正又多野食！但係食lunch 又未試過，咁呢日就係八十後未轉工時去食啦。

lunch set 其實真係好抵，有個主食加杯野飲，都係40幾50蚊左右，係銅鑼灣黎講算係咁。

見冇咩菜，所以我地先叫個沙律先，一般般。

白咖哩厚切豬排飯：白咖哩可以話係沙嗲王最正既咖哩，撈飯一流。個豬排都好嫩喎，同埋真係好厚，個皮都脆，啖啖肉，好食。個飯上果時已經跌埋一邊，搞到張相唔靚哈哈。

呢個牛柳粒米意就差d喇：90後未食過米意，第一次食，先知原來係米咁但係pasta既texture。d牛柳有少少鞋，要咬多幾下先吞到落去。同埋得忌廉蘑菇味，冇咩其他既味喇，要自己問佢拎鹽加返少少味先好d。

不過我地坐正餐車隔離，d野king king clown clown 有d嘈，但d位都算係寬敞舒適。